Մուտք

Invalid username or password

Մոռացե՞լ եք գաղտնաբառը

5 խորհուրդ՝ ինչպես կրճատել արտերկրում արձակուրդի ծախսերը. ABCfinance

Վերադարձ լուրերի բաժին

Խորագրեր

Դայջեսթ

15:54 , 29 Օգոստոս 2015

 

  1. Նախօրո՛ք պլանավորեք Ձեր բյուջեն:

Ինչու՞.
Մինչև արձակուրդ գնալը, հաշվարկելով Ձեր արձակուրդի համար անհրաժեշտ բոլոր հնարավոր ծախսերը, Դուք կտեսնեք՝ որքան գումար է Ձեզ անհրաժեշտ, և կկարողանաք խուսափել արձակուրդի ժամանակ լրացուցիչ, անտեղի ծախսերից: Համաձայն ուսումնասիրությունների՝ մարդկանց 80%-ը արձակուրդի ժամանակ ծախսում են ավել գումար, քան իրականում կարծում էին, թե կծախսեն:

Ինչպե՞ս.
Գրառեք և հաշվառեք Ձեր արձակուրդի հետ կապված բոլոր ծախսերը. այդ թվում՝ ճանապարհորդային ապահովագրություն, գիշերակաց, արձակուրդի համար անհրաժեշտ հագուստ, ուտելիք և ըմպելիք, տրանսպորտ, ժամանց և այլ:
Սահմանեք արձակուրդի համար անհրաժեշտ ամենակարևոր ծախսերը և գումարը ծախսեք ըստ առաջնահերթության:

  1. Մի՛ շտապեք վարկ վերցնելիս:

Ինչու՞.
Արձակուրդը կազմակերպելու լավագույն միջոցը կուտակված խնայողություններն են, սակայն եթե Ձեր խնայողությունները բավարար չեն և Դուք, այնուամենայնիվ, պատրաստվում եք արձակուրդը կազմակերպելու համար վարկ վերցնել, ապա վստահ եղեք, որ փնտրել և գտել եք ամենաէժան վարկատեսակը:

Ինչպե՞ս.
Ֆինանսական օգնականի միջոցով հեշտ և արագ գտեք ՀՀ բանկերի և վարկային կազմակերպությունների կողմից առաջարկած ամենաէժան վարկերը:
Մինչև վարկ վերցնելը կազմեք ծրագիր, թե ինչպես եք իրականցվելու վարկի մարումը: Հիշեք՝ եթե վարկի մարումները կատարեք ուշացումներով, ապա կձևավորեք վատ վարկային պատմություն:

  1. Ուշադի՛ր եղեք վճարային քարտ ընտրելիս և օգտագործելիս

Ինչու՞.
Շատ մարդիկ արտերկրում որպես վճարումներ կատարելու էժան տարբերակ նախընտրում են օգտագործել վճարային քարտ: Իրականում վճարային քարտը կլինի արտերկրում վճարումներ կատարելու լավագույն տարբերակ միայն, եթե Դուք ընտրել եք ճիշտ վճարային քարտ և ուշադիր եք այն օգտագործելիս:

Ինչպե՞ս.
Ուսումնասիրեք շուկան և գտեք Ձեզ ամենահարմար վճարային քարտը:
Ընտրեք քարտի տեսակը Visa. Master և այլ ` կախված նրանից, թե որ արժույթն է համարվում հիմնական կամ առավել շատ օգտագործվող այդ երկրում:
Մինչև արտերկիր մեկնելը ճշտեք՝ որքան է կազմում այդ երկրում քարտից գումար կանխիկացնելու միջնորդավճարը: Նվազագույնը այն կարող է կազմել Ձեր կանխիկացվող գումարի 2-3%-ը:
Եթե արտերկրում օգտագործելու եք Ձեր մշտական հեռախոսահամարը, ապա օգտվեք քարտային հաշվի շարժը ցույց տվող «բջջային հաղորդագրություն» ծառայությունից: Սա կօգնի sms-ների միջոցով անընդհատ տեսնել հաշվի մնացորդը և կառավարել ծախսերը:
Ձեր մոտ պահեք Ձեր բանկի կոնտակտային տվյալները: Հիշեք քարտը կորցնելու դեպքում կամ Ձեր ծախսի մասին անհապաղ պետք է զանգահարել բանկ և արգելափակել այն:
Օգտվեք միայն ապահով, վերահսկվող և լուսավոր վայրերում տեղակայված բանկոմատներից:
Մի թույլատրեք, որ ռեստորանում կամ այլ վայրում քարտով վճարում կատարելիս այն հեռացնեն Ձեր տեսադաշտից: Հիշեք՝ նմանատիպ վայրերում POS-տերմինալը պետք է լինի շարժական, ուստի վճարումը կատարելիս աշխատակիցը ոչ թե պետք է հեռացնի քարտը, այլ պետք է մոտեցնի POS-տերմինալը:
Մինչև անդորրագիրը ստորագրելը, ստուգեք՝ արդյոք անդորրագրում նշված գումարը համընկնում է գործարքի գումարին:
Մի վստահեք Ձեր քարտը կամ ծածկագիրը անծանոթ մարդկանց:
Ուշադիր եղեք քարտով վճարումներ անելիս, չնայած այն համարվում է արտերկրում վճարում կատարելու լավագույն միջոցներից մեկը, այնուամենայնիվ քարտով վճարումները ավելի դժվար է վերահսկել, և կառավարել ծախսերը:

  1. Ուշադի՛ր եղեք Ձեզ մոտ առկա կանխիկ գումարին:

Ինչու՞.
Չնայած, որպես կանոն, կանխիկ գումարը ավելի հեշտ է կառավարել, քանի որ ծախսերը տեսանելի և շոշափելի են, այնուամենայնիվ կանխիկը նաև հեշտ է կորցնել: Շատերը հաստատում են, որ արձակուրդը ընդհատելու ամենատարածված պատճառներից մեկը գումարի կորուստն է: Ուստի պետք է լինել ուշադիր, թե որտեղ եք պահում և ինչպես եք տնօրինում Ձեզ մոտ առկա կանխիկը:

Ինչպե՞ս.
Միշտ ունեցեք Ձեզ հետ որոշ կանխիկ գումար՝ փոքր և անվստահելի վայրերից գնումերի անելու համար:
Խուսափեք գումարը օդանավակայանում փոխանակելուց, քանի որ այնտեղ ամենաբարձր գներն են:
Բաշխեք և պահեք կանխիկ գումարը տարբեր վայրերում, օրինակ` մի մասը դրամապանակում, մյուս մասը ճամպրուկում և գրպանում:
Փողոցում քայլելիս կամ անծանոթների մոտ մի խոսեք Ձեզ մոտ առկա գումարի մասին:
Ուշադիր եղեք Ձեր դրամապանակի և պայուսակի նկատմամբ:

  1. Ապահովագրե՛ք Ձեզ անսպասելի ծախսերից:

Ինչու՞.
Ենթադրենք իրավիճակ, երբ Դուք գտնվում եք օտար երկրում, միայնակ, և Ձեզ հետ պատահում է տհաճ, անսպասելի պատահար, որը Ձեզ կանգնեցնում է լուրջ ծախսերի առջև, որոնց Դուք պատրաստ չեք: Օրինակ՝ ճամպրուկի կորուստ, վթար, վատառողջություն, շտապ վիրահատության անհրաժեշտություն և այլ:
Այս պարագայում Դուք կլինեք ապահով, եթե նախօրոք արձակուրդի համար ձեռք եք բերել ճանապարհորդային ապահովագրություն։ Այսինքն` մինչև արձակուրդ մեկնելը, ապահովագրական ընկերությանը վճարելով փոքր գումար (ապահովագրավճար), ստացել եք ապահովագրական վկայագիր, և եթե ճամփորդության ընթացքում Ձեզ հետ տեղի ունենա որևէ պատահար, ապահովագրական ընկերությունը կհոգա առաջացած ծախսերը։

Ինչպե՞ս.
Ուսումնասիրեք և գտեք ճանապարհորդային ապահովագրության այն տեսակը որը առավելագույն բավարարում է Ձեր պահանջները: Մի շտապեք միանգամից ընտրել ամենաէժան տարբերակը. էժան դեռևս չի նշանակում հարմար տարբերակ:
Ճշտեք Ձեր ապահովագրական ընկերությունից՝ արդյոք Ձեր ընտրած ճանապարհորդային ապահովագրության տեսակը գործում է այն երկրում, ուր մեկնում եք:
Մինչև ճանապարհորդային ապահովագրության պայմանագիր կնքելը, ուշադիր պայմանագրում կարդացեք՝ որ դեպքերն են հատուցվում և որոնք են կազմում բացառություններ:
Եթե պարբերաբար մեկնում եք արտերկիր, ապա ձեռնտու է վերցնել ճանապարհորդային ապահովագրություն ավելի երկար ժամանակահատվածի համար:
Այն հեռախոսահամարը, որին պետք է զանգահարեք պատահարի դեպքում՝ պահեք Ձեզ հեշտ հասանելի վայրում օրինակ՝ պայուսակում, դրամապանակում կամ գրպանում:

Ըստ՝ ABCfinance.am-ի

ԱՄԵՆԱԿԱՐԴԱՑՎԱԾ ԼՈՒՐԵՐ

Ինչու՞ են մեծ ընկերություններում արգելում խոսել աշխատավարձի մասին

Մի քանի տարի առաջ Հարվարդի համալսարանում հետազոտություն են անում, որի ընթացքում ուսանողներին տալիս են հետևյալ հարցը

5 հայտնի մոդելների չինական ամենահաջողված կրկնօրինակները (տեսանյութ)

Mercedes Gelandewagen, Range Rover, Porsche, Ford, Lexus մակնիշների առանձին մոդելներն ու դրանց չինական պատճենները

Citizen. կոկտեյլի բաղադրատոմս՝ Երևանի կոնյակի գործարանից

ARARAT Brandy ֆեյսբուքյան էջը կիսվել է «Citizen» կոկտեյլի բաղադրատոմսով։