Մուտք

Invalid username or password

Մոռացե՞լ եք գաղտնաբառը

«Մենք համախմբելու ենք հայկական ինտելեկտուալ կապիտալը՝ հանուն հայկական շահի». Արեգ Գալստյան

Վերադարձ լուրերի բաժին
EXCLUSIVE

15:42 , 08 Հունիս 2017

Հունիսի 5-ին պաշտոնապես գրանցվեց The Armenian Interest (Հայկական շահ) գիտավերլուծական կենտրոնը։ Կազմակերպության առաքելությունը, ինչպես և կարելի է անվանումից կռահել, հետևյալն է՝ միավորել մարդկանց և գաղափարները հայկական շահերի շուրջ։

Արդեն գործում է The Armenian Interest-ի եռալեզու օնլայն-հարթակը, որտեղ հրապարակվել են այնպիսի հեղինակավոր փորձագետների զեկույցներ, ինչպիսիք են Վլադիսլավ Ինոզեմցևը, Փիթեր Սլագլեթը և այլոք։

Ինչի՞ համար է ստեղծվում այս կառույցը, ի՞նչ խնդիրներ է իր առջև դնելու և ինչպես է հասնելու դրանց լուծմանը։ Այս և այլ հարցերի շուրջ B4B.am-ը զրուցել է “The Armenian Interest”-ի հիմնադիր և ղեկավար Արեգ Գալստյանի հետ (Ա. Գալստյանը գիտությունների թեկնածու է և  Forbes, The National Interest, The Hill and the American Thinker հեղինակավոր ամսագրերի թղթակից)։

– – – – – – – – – – – – – – – – – – – – – – – – – – – –

– Պրն Գալստյան, մի քանի նախադասությամբ կասե՞ք՝ ինչ է The Armenian Interest-ը և ինչի համար է այն ստեղծվում։

– The Armenian Interest-ը գիտավերլուծական կենտրոն է, որը կոչված է նպաստելու հայկական շահերի համախմբմանն ու առաջմղմանը: Մեր նպատակն է Հայաստանի և հայության շուրջ տեղի ունեցող, և առհասարակ հայկական շահերին առնչվող գործընթացների ծանրության կենտրոն դարձնել հայկական գործոնը: Այդ նպատակին հասնելու համար մենք համախմբելու ենք հայկական ինտելեկտուալ կապիտալը, համագործակցելու ենք աշխարհի առաջատար փորձագետների և ուղեղային կենտրոնների հետ, ապահովելու ենք գիտական հարթակ փորձագիտական քննարկումների համար:

Հուսով ենք, որ մեզ կհաջողվի տեղեկատվական-վերլուծական տարածությունում հանուն հայության շահերի միավորել հայկական, և ոչ միայն հայկական վերլուծական ներուժը:

– Հայաստանում կան մեծ թվով վերլուծական կենտրոններ, հասարակական կազմակերպություններ և այլ կառույցներ։ Նրանք չե՞ն ցանկանում, թե՞ չեն կարողանում լուծել այն խնդիրները, որ պետք է լուծի AI-ը։

– The Armenian Interest-ը համախմբող կառույց է: Այդ իսկ պատճառով, մենք չենք հակադրում մեզ որևէ այլ կազմակերպության կամ կառույցի: Մենք պատրաստ ենք համագործակցության բոլորի հետ, ովքեր գործում են հանուն ընդհանուր նպատակի և կիսում են մեր տեսլականը: Մենք համախմբվել ենք և պատրաստվում ենք գործել հայակենտրոնության սկզբունքի շրջանակներում: Այս սկզբունքի հետևորդներն, ըստ մեզ, անբավարար են ներկայացված հայկական իրականությունում: Մենք փորձ ենք կատարում փոխել իրավիճակը, քանի որ հայկական շահերը ենթադրում են հայակենտրոն աշխարհայացքի գերակայություն:

– Ե՞րբ որոշեցիք, որ նման կառույցի կարիք կա։

– Նախաձեռնության միտքը առաջացել էր վաղուց: Սակայն մեր կարծիքով, նման ծավալների նախագիծ նախաձեռնելու և իրականացնելու համար հարկ է կուտակել անհրաժեշտ նվազագույն սոցիալական և մտավոր կապիտալ: Մենք գտնում ենք, որ ժամանակի հրամայականն է գլոբալ տարածությունում հայկական ընդհանուր շահի ձևավորման ու պաշտպանության գործուն կազմակերպության գոյությունը:

– Կարելի է ասել, որ դուք զբաղվելու եք այն հարցերով, որոնք գտնվում են տարբեր պետական կառույցների գործունեության տրամաբանության շրջանակներում։

– Ինչպես արդեն նշեցինք, մեր կազմակերպության նպատակը հայկական շահերի առաջմղումն է: Այդ նպատակի իրականացման համար մենք միտված ենք համախմբելու դաշտում առկա ամբողջ ներուժը: Այդ ճանապարհին մենք պատրաստ ենք համագործակցել ինչպես պետական, այնպես էլ ոչ պետական բոլոր կառույցների և անհատների հետ, ովքեր կարող են իրենց ներդրումն ունենալ ընդհանուր գործում:

Ավելին՝ պատրաստ ենք աջակցել ցանկացած նախարարության կամ այլ կառույցի, որն իր նպատակներում հետապնդում է հայկական շահերի պաշտպանությունն ու առաջխաղացումը: Մենք այն կարծիքին ենք, որ ընդհանուր համազգային նշանակություն ունեցող հարցերում հայության տարբեր հատվածների միջև չկան և չեն կարող լինել մրցակցային ընկալումներ:

– Ո՞րն եք համարում ամենակարևոր խնդիրը, որը պետք է լուծեք AI-ի կայացման ճանապարհին։ Ֆինանսները՞, մտածելակերպն ու ստերեոտիպերը՞, թե այլ բաներ էլ կան։

– Մեր ամենակարևոր խնդիրը հայ մարդու մտածելակերպում միասնական շահի գիտակցության ծիլերի ամրապնդումն է: Մտածելակերպի, աշխարհայացքի, մոտեցումների արդիականացումը, ինքնության գիտակցումը, համախմբման ձգտումը և մի շարք այլ էթնոպահպան գործառույթներ առաջնային կարևորություն ունեն հայկական շահի ձևավորման ու պաշտպանության տեսակետից: Այդ առումով կարելի է պնդել, որ The Armenian Interest-ը բազմակողմանի գործունեության ասպարեզ և առաջարկ է հայ մարդուն՝ ինքնաճանաչման ու ժամանակին համընթաց քայլելու համար:

– AI-ը անդրադառնալու՞ է Հայաստանի ներքաղաքական թեմաներին, թե հիմնական շեշտը դրվելու է գլոբալ, արտաքին թեմաների վրա։

– Մենք լավ ենք հասկանում, որ առանց ներքաղաքական գործընթացների բազմակողմանի վերլուծության հնարավոր չէ ներկայացնել հայկական տեսակետը միջազգային հարաբերություններում: Սակայն մենք նաև հայտարարել ենք, որ ցանկանում ենք հայկական շահերի տրամաբանության շրջանակներում համախմբել բոլորին:

Մենք ապաքաղաքական կառույց ենք, ոչ մի ուժի նկատմամբ չունենք համակրանք: Մեր հիմնական մոտեցումը հայակենտրոնությունն է:

– Կա՞ն արդյոք նախնական պայմավորվածություններ փորձագետների հետ։

– Այո, առկա են մի շարք պայմանավորվածություններ տարբեր երկրների առաջատար փորձագետների հետ: Նրանց շարքում կան ինչպես ազգությամբ հայ, այնպես էլ այլազգի նշանակալի գործիչներ: Մեր գործունեության ընթացքում նախատեսում ենք ներկայացնել ամենատարբեր տեսակետներ ու մոտեցումներ, որոնք այս կամ այն կերպ նպաստելու են մեր կազմակերպության առաքելության, նպատակի և խնդիրների իրականացմանը:

– Ի՞նչ պարբերականությամբ են թարմացվելու կայքի նյութերը։

– Թարմացվելու են՝ ըստ նյութերի պատրաստման ժամանակացույցի, ինչպես նաև արդիականության, օրակարգի և օբյեկտիվության ցուցանիշների: Տարբեր ժամանակային կտրվածքում կարող են այդ ցուցանիշները տարբերվել: Ամեն դեպքում, մեր կազմակերպության աշխատանքում հաշվի են առնվելու ժամանակի բոլոր հրամայականները:

– Լինելու՞ է մշտական աշխատակազմ։ Քանի՞ հոգանոց։ Որտեղ է լինելու գլխավոր գրասենյակը։

– Այո, The Armenian Interest-ը արդեն իսկ ունի մշտական աշխատակազմ: Այն մեծաքանակ չէ, բաղկացած է միայն նվիրյալներից: Կազմակերպության գլխավոր գրասենյակը գտնվելու է Երևան քաղաքում:

ԱՄԵՆԱԿԱՐԴԱՑՎԱԾ ԼՈՒՐԵՐ

Կենսաթոշակային հեղափոխություն. Քայլ առաջին

Տնտեսագետ, ՀՀ վարչապետի խորհրդական Մեսրոպ Առաքելյանի հոդվածը՝ նվազագույն կենսաթոշակը 25.5 հազար դրամ սահմանելու նախաձեռնության մասին։

Քոչարյանական  «աճի» առասպելը. Տնտեսագիտության դոկտոր Աշոտ Մարկոսյանի վերլուծությունը

Տնտեսագետ ԱՇՈՏ ՄԱՐԿՈՍՅԱՆԸ B4B.am-ին է տրամադրել իր կատարած վերլուծությունը, որը վերաբերում է ՀՀ երկրորդ նախագահ Ռոբերտ Քոչարյանի կառավարման տարիներին գրանցված ու այդքան գովերգվող երկնիշ աճին

Օնլայն հարցման մասնակիցների 63%-ը գոհ է կառավարության գործունեությունից

B4B.am կայքում շարունակվում է օնլայն հարցումը, որով առաջարկում էինք գնահատել ամբողջ կառավարությանը և առանձին պաշտոնյաներին՝ 2.5 ամիսների գործունեության արդյունքներով։