Մուտք

Invalid username or password

Մոռացե՞լ եք գաղտնաբառը

Հակածխախոտային օրենքի որոշ դրույթների կիրառումը կարող է հետաձգվել մեկ տարով՝ տնտեսության վրա բացասական ազդեցությունը մեղմելու համար

Վերադարձ լուրերի բաժին

16:12 , 23 Դեկտեմբեր 2020

ԱԺ տնտեսական հարցերի մշտական հանձնաժողովի արտահերթ նիստում քննարկվեց «Ծխախոտային արտադրատեսակների և դրանց փոխարինիչների օգտագործման հետևանքով առողջությանը հասցվող վնասի նվազեցման և կանխարգելման մասին» և «Վարչական իրավախախտումների վերաբերյալ օրենսգրքում փոփոխություններ և լրացումներ կատարելու մասին» օրենքներում փոփոխությունների նախագծերի փաթեթը:

Հիմնական զեկուցող, հանձնաժողովի նախագահ Բաբկեն Թունյանը նշեց, որ փաթեթն ընդունվել է այս տարվա փետրվարի 13-ին՝ երկարուձիգ, թեժ քննարկումներից հետո: Օրենքով խիստ սահմանափակումներ են մտցվում՝ ծխախոտի մակնշումից, փաթեթավորումից, գովազդից մինչև փակ, բաց տարածքներում ծխելու հետ կապված:

Թունյանը նշեց, որ առաջարկվում է մեկ տարով հետաձգել օրենքի երեք դրույթի կիրառումը, որոնք ուժի մեջ են մտնում 2021-ի հունվարի 1-ից: Փոփոխությունն, ըստ պատգամավորի, պայմանավորված է կորոնավիրուսից և ռազմական գործողություններից հետո ստեղծված իրավիճակում տնտեսության և հարկային եկամուտների վրա բացասական ազդեցության մեղմմամբ, ինչպես նաև որոշ դրույթների հետ կապված լրացուցիչ վերլուծություններ անելու հնարավորության ստեղծմամբ, մասնավորապես՝ օրենքի կիրառումն ինչ ազդեցություն է ունենալու մարդկանց առողջության և բիզնեսի վրա:

Թունյանը հայտնեց, որ առաջարկվում է հետաձգել հետևյալ դրույթները՝ առևտրի կետերում ծխախոտային արտադրատեսակների ցուցադրության արգելք, տուփերի կամ բլոկների ցուցադրության արգելք, փոխարինիչների և ծխախոտային արտադրատեսակների մակնշում: «Առաջարկում ենք հետաձգել, քանի որ խիստ կասկածելի է, թե քանի տոկոսով է ծխողների թիվը նվազելու, բայց տնտեսվարողների եկամուտների վրա ազդեցությունը խիստ էական է լինելու. խոսքը մի քանի հազար տնտեսվարողների և մի քանի միլիարդ դրամի մասին է»,- պարզաբանեց նա:

Բ.Թունյանն ասաց, որ փակ, կիսափակ և բաց տարածքներում ծխելու վերաբերյալ դրույթները մնում են անփոփոխ:

Կառավարության դիրքորոշումը ներկայացրեց առողջապահության նախարարի տեղակալ Լենա Նանուշյանը, որի խոսքով՝ օրենքի նշված դրույթների հետաձգումն էլ ավելի կվատթարացնի առկա վատթար վիճակը: «Կառավարության դիրքորոշումը հետևյալն է՝ եթե այս դրույթներն ուժի մեջ մտնեն, որևէ բացասական ազդեցություն չեն ունենա տնտեսության վրա: Օրենքի բոլոր դրույթների կիրառումը շատ կարևոր է, և, ի դեպ, դրանց կիրառման ժամկետը հետաձգվել է հենց հանձնաժողովի առաջարկով: Փոխնախարարն առաջարկեց խնդրին անդրադառնալ հաջորդ տարի՝ թույլ տալով, որ այդ դրույթները մտնեն ուժի մեջ՝ հորդորելով օրենքի փոփոխությունների նախագիծը հանել շրջանառությունից:

Երկար ու թեժ քննարկումից հետո նախագծերի փաթեթը քվեարկության դրվեց, արժանացավ հանձնաժողովի անդամների հավանությանը և ներառվեց դեկտեմբերի 24-ին նախատեսված ԱԺ արտահերթ նիստի օրակարգում:

ԱՄԵՆԱԿԱՐԴԱՑՎԱԾ ԼՈՒՐԵՐ

2020 թվականին ՀՀ պետական եկամուտների կոմիտեն հավաքագրել է 1 տրլն 385.2 մլրդ դրամի եկամուտ

ՊԵԿ նախագահ Էդվարդ Հովհաննիսյանը ներկայացրել է 2020 թվականի ընթացքում հավաքագրված եկամուտները:

15.01.2021: Շաբաթական ամփոփ տվյալներ

2020 թ. դեկտեմբերի 28-ից 2021 թ. հունվարի 10-ն ընկած ժամանակահատվածում բանկերի կողմից դրամով տեղաբաշխված միջոցների ծավալը կազմել է 58.9 մլրդ դրամ, իսկ ԱՄՆ դոլարով տեղաբաշխված միջոցների ծավալը՝ 29.3 մլն ԱՄՆ դոլար:

«ՄՈԳՈ»-ից վերադարձման ենթակա գումարների մասին

Պատասխանատվության միջոցը կիրառվել է «Սպառողական կրեդիտավորման մասին» ՀՀ օրենքով և ՀՀ ԿԲ Խորհրդի 28.07.2009 թվականի թիվ 229-Ն որոշմամբ հաստատված կանոնակարգ 8/05-ով սահմանված պահանջների խախտման արդյունքում. կիրառվել է տուգանք՝ 500.000 ՀՀ դրամ գումարի չափով։