Մուտք

Invalid username or password

Մոռացե՞լ եք գաղտնաբառը

Բանկերի ընդհանուր կապիտալների չափերը հայտնի են. ով որքանով փակեց 2016-ը

Վերադարձ լուրերի բաժին

10:56 , 23 Հունվար 2017

2014 թվականի դեկտեմբերի 30-ին ՀՀ Կենտրոնական բանկը որոշում ընդունեց, որը լուրջ փոփոխություն էր ենթադրում բանկային համակարգի համար։

ԿԲ-ն բանկերի ընդհանուր կապիտալի նվազագույն չափը սահմանեց 30 մլրդ դրամ՝ նախկին 5 մլրդ դրամի փոխարեն:

Նոր ստեղծվող բանկերի համար պահանջը ուժի մեջ մտավ արդեն 2015-ի հունվարի 1-ից։

Իսկ գործող բանկերը 2 տարի ժամանակ ստացան՝ կապիտալը համալրելու համար։ Այսինքն, ՀՀ գործող առևտրային բանկերի ընդհանուր կապիտալը 2017թ. հունվարի 1-ի դրությամբ և դրանից հետո պետք է համապատասխաներ նոր պահանջին՝ 30 մլրդ դրամ։

Շուկայում մնացած 17 առևտրային բանկերը օրերս հրապարակեցին 2016 թվականի 4-րդ եռամսյակի հաշվետվությունները, այդ թվում՝ հիմնական տնտեսական նորմատիվների վերաբերյալ։

Բանկերից 7-ը 2016 թվականի երրորդ եռամսյակի վերջի դրությամբ արդեն համալրել էին կապիտալը և համապատասխանում էին ԿԲ-ի նոր պահանջին։ Մնացածը կապիտալը համալրել են 4-րդ եռամսյակում։

Ինչպես երևում է B4B Pro համակարգի տրամադրած տվյալներից, ընդհանուր կապիտալի մեծությամբ առաջին տեղում Ամերիաբանկն է (81.92 մլրդ դրամ), երկրորդում՝ ԱԿԲԱ-Կրեդիտ Ագրիկոլ բանկը (48.44 մլրդ դրամ), երրորդում՝ Արդշինբանկը (45.1 մլրդ դրամ)։

Մի կարևոր նկատառում Արցախբանկի ցուցանիշի մասով։ Ըստ հաշվետվության՝ 2016-ի 4-րդ եռամսյակում Արցախբանկի ընդհանուր կապիտալի չափը 17.86 մլրդ դրամ է (պահանջվող 30 մլրդից քիչ)։ Պատճառն այն է, որ բանկը կապիտալը համալրել է դեկտեմբերի 28-ին և ընդհանուր կապիտալի միջինացված ցուցանիշը եռամսյակի համար ցածր թիվ է կազմել։ Արցախբանկից B4B.am-ին տեղեկացրին, որ դեկտեմբերի 31-ի դրությամբ ընդհանուր կապիտալի չափը կազմել է 31.455 մլրդ դրամ։

Ի դեպ, նման հանգամանք կա նաև Յունիբանկի դեպքում։ Հաշվետվության համաձայն՝ 4-րդ եռամսյակում ընդհանուր կապիտալի միջին չափը եղել է 27 մլրդ դրամ, սակայն ծանոթագրության մեջ նշվում է, որ դեկտեմբերի 31-ի դրությամբ այն կազմել է 30.17 մլրդ դրամ։

17-banks

Հիշեցնենք, որ ԿԲ որոշման ընդունման պահին Հայաստանում գործում էր 21 առևտրային բանկ։ 2015-2016թթ. ընթացքում բանկերի թիվը պակասեց 4-ով։

Միաձուլման առաջին գործարքների մասին հայտնի դարձավ դեռ 2015-ի դեկտեմբերին, սակայն դե-յուրե դրանք տեղի ունեցան 2016-ի ընթացքում։

Նախ, 2015-ի հոկտեմբերի 20-ին տեղեկություն տարածվեց, որ «Հայէկոնոմբանկը» իրեն է միացնում ղազախական ԲՏԱ-Հայաստան բանկը (տեղեկությունը հաստատվեց Սուքիասյանների ընտանիքի կողմից)։ Գործարքն ավարտվեց 2016-ի օգոստոսի 24-ին, երբ ԿԲ-ն ուժը կորցրած ճանաչեց ԲՏԱ-Հայաստան բանկի լիցենզիան։

Հաջորդը «ՊրոԿրեդիտ Բանկն» էր։ 2015-ի դեկտեմբերին հայտարարվեց, որ «ՊրոԿրեդիտ Բանկը» ձեռք է բերվում «Ինեկոբանկի» կողմից (2016-ի մայիսի 10-ին ԿԲ-ն  ուժը կորցրած ճանաչեց «ՊրոԿրեդիտ Բանկ» ՓԲԸ բանկային գործունեության լիցենզիան)։

Ձեռք բերվող հաջորդ բանկը, շատերի համար զարմանալի կերպով, դարձավ «Առէկսիմբանկ-Գազպրոմբանկի խումբ» բանկը՝ կլանվելով «Արդշինբանկի» կողմից։  2016թ.-ի հոկտեմբերի 7-ին ավարտվեց «Առէկսիմբանկ-Գազպրոմբանկի խումբ» ՓԲԸ-ի բաժնետոմսերի 100%-ի «Ռեգիոն» Ֆինանսական Արդյունաբերական Կորպորացիայի կողմից ձեռքբերման գործարքը, որի միակ բաժնետերն է հանդիսանում «Արդշինբանկ» ՓԲԸ վերջնական շահառու և Խորհրդի նախագահ, Ռուսաստանում հայտնի գործարար Կարեն Սաֆարյանը։

Իսկ 2016 թվականի նոյեմբերի 26-ին հայտնի դարձավ, որ «Զարգացման Հայկական Բանկ» բաց բաժնետիրական ընկերությունը միանում «Արարատբանկին»։ ՀՀ Կենտրոնական բանկը դեկտեմբերի 20-ին առաջ հայտարարեց, որ ԿԲ խորհուրդը դեկտեմբերի 15-ին հաստատել և գրանցել է «Արարատբանկի» (Պահպանվող Բանկ) և «Զարգացման հայկական բանկի» (Միացող Բանկ) միացման պայմանագիրը:

ԱՄԵՆԱԿԱՐԴԱՑՎԱԾ ԼՈՒՐԵՐ

Ազգային անվտանգության խորհրդի նիստում քննարկվել է ռազմարդյունաբերական համալիրի զարգացման

Հանրապետության Նախագահ, Ազգային անվտանգության խորհրդի նախագահ Սերժ Սարգսյանն այսօր հրավիրել է Ազգային անվտանգության խորհրդի նիստ

«Մեղրի» ազատ տնտեսական գոտին պաշտոնապես մեկնարկեց իր գործունեությունը (լուսանկարներ)

Դեկտեմբերի 15-ին, ՀՀ վարչապետ Կարեն Կարապետյանի ներկայությամբ, տրվել է «Մեղրի» ազատ տնտեսական գոտու (ԱՏԳ) գործունեության պաշտոնական մեկնարկը։

«Ավելի խիստ վարչարարությունը կիրառվում է ռիսկային համարվող հարկատուների դեպքում». Արմեն Սաֆարյան

Հարցազրույց ՀՀ ԿԱ Պետական եկամուտների կոմիտեի Խոշոր և միջին հարկ վճարողների տեսչություն-վարչության պետ Արմեն Սաֆարյանի հետ