Մուտք

Invalid username or password

Մոռացե՞լ եք գաղտնաբառը

Առաջին տնտեսական ցուցանիշները՝ Նիկոլ Փաշինյանի կառավարության «օրոք»

Վերադարձ լուրերի բաժին

12:52 , 22 Հունիս 2018

Ազգային վիճակագրական ծառայությունը 2 օր առաջ հրապարակեց 2018 թվականի հունվար-մայիս ժամանակահատվածի ցուցանիշները։ Սկսենք, թերևս, ամենակարևոր՝ տնտեսական ակտիվության ցուցանիշից (ՏԱՑ)։

Այսպես, 2018 թվականի հունվար-մայիսին՝ նախորդ տարվա նույն ժամանակահատվածի համեմատ, տնտեսական ակտիվության ցուցանիշն աճել է 8.6%-ով։ Ինչպես տեսնում եք գծապատկերում, ՏԱՑ-ի հավելաճը ժամանակահատվածի կտրվածքով այս տարվա ընթացքում նվազել է։ 2018 թվականի հունվար-մարտին այն 11% էր, հունվար-ապրիլին՝ 9.7%։

Աճի տեմպը նվազել է նաև 12-ամսյա կտրվածքով՝ յուրաքանչյուր ամիսը՝ նախորդ տարվա նույն ամսվա համեմատ։ Այսպես, 2018 թվականի մայիսին՝ 2017-ի մայիսի համեմատ, ՏԱՑ-ն աճել է 5.4%-ով։ Մինչդեռ ապրիլին՝ ապրիլի համեմատ, աճը 7.3% էր, իսկ մարտին՝ մարտի համեմատ՝ 11%։

Դինամիկան ավելի լավ պատկերացնելու համար պետք է ուշադրություն դարձնել նաև ամսական ցուցանիշին. ինչպե՞ս է փոխվել տնտեսական ակտիվությունը յուրաքանչյուր ամիս՝ նախորդ ամսվա համեմատ։

tac-may

Գծապատկերում այդ ցուցանիշն արտացոլված է մուգ հաստ կորով։ Ինչպես տեսնում եք, ապրիլին՝ մարտի համեմատ, տնտեսական ակտիվությունը նվազել էր։ Նախապես հրապարակված տվյալներով՝ ՏԱՑ-ը նվազել էր 3.1%-ով, սակայն սեզոնային ճշգրտմամբ՝ նվազումը 1.6% է։ Ապրիլին՝ մարտի համեմատ, անկում էր գրանցվել գրեթե բոլոր ուղղություններով՝ բացառությամբ շինարարության։ Հիշեցնենք, որ թավշյա հեղափոխության հետ կապված՝ զանգվածային անհնազանդության ակցիաները տեղի էին ունենում հենց ապրիլի երկրորդ կեսին, և այս ժամանակավոր անկումը մասամբ նաև այդ իրադարձությունների հետևանք էր։ Ապրիլյան անկման հետևանքով էլ տնտեսական ակտիվության աճի տեմպը թուլացավ՝ նվազեցնելով հունվար-ապրիլ և հունվար մայիս ժամանակահատվածների ցուցանիշները։

Սակայն մայիսին՝ ապրիլի նկատմամբ, տնտեսական ակտիվության ցուցանիշն աճել է 10.6%-ով (ընդգծենք, որ հունվարից ապրիլ ամսական այս ցուցանիշները ճշգրտված են, մայիսինը՝ դեռ նախնական)։ Այս կտրուկ աճն ինչ-որ չափով պայմանավորված է նախորդ ամսվա անկմամբ։ Սակայն ընդհանուր առմամբ ցույց է տալիս, որ տնտեսական աճի տեմպը սկսում է վերականգնվել։

Ամեն դեպքում, ամիսը նախորդ ամսվա հետ համեմատելով՝ չի կարելի պատկերացում կազմել նախորդ տարվա համեմատ զարգացումների մասին, քանի որ դեր է խաղում սեզոնային գործոնը։ Այդ իսկ պատճառով եկեք դիտարկենք առանձին ուղղությունների շարժը՝ նախորդ տարվա համեմատ։

Արդյունաբերական արտադրանք

2018 թվականի մայիսը՝ 2017 թվականի մայիսի համեմատ, 3.1% անկում։ 2018 թվականի հունվար-մայիսը՝ 2017 թվականի հունվար-մայիսի համեմատ՝ 3.3% աճ։ Արտադրանքի ծավալը հունվար-մայիսին ընթացիկ գներով՝ 658.3 մլրդ դրամ։

Գյուղատնտեսություն

2018 թվականի մայիսը 2017 թվականի մայիսի համեմատ՝ 0.1% աճ։ 2018 թվականի հունվար-մայիսը՝ 2017 թվականի հունվար-մայիսի համեմատ, 1.1% աճ։ Արտադրանքի ծավալը հունվար-մայիսին ընթացիկ գներով՝ 180.3 մլրդ դրամ։

Շինարարություն

2018 թվականի մայիսը՝ 2017 թվականի մայիսի համեմատ, 8.8% աճ։ 2018 թվականի հունվար-մայիսը՝ 2017 թվականի հունվար-մայիսի համեմատ, 17.4% աճ։ Շինարարության ծավալը հունվար-մայիսին ընթացիկ գներով՝ 93.7 մլրդ դրամ։

Առևտրաշրջանառություն

2018 թվականի մայիսը 2017 թվականի մայիսի համեմատ՝ 8.8% աճ։ 2018 թվականի հունվար-մայիսը 2017 թվականի հունվար-մայիսի համեմատ՝ 10.2% աճ։ Առևտրաշրջանառության ծավալը հունվար-մայիսին ընթացիկ գներով՝ 1 տրլն 23.3 մլրդ դրամ։

Ծառայություններ

2018 թվականի մայիսը 2017 թվականի մայիսի համեմատ՝ 17% աճ։ 2018 թվականի հունվար-մայիսը 2017 թվականի հունվար-մայիսի համեմատ՝ 17.5% աճ։ Ծառայությունների ծավալը հունվար-մայիսին ընթացիկ գներով՝ 626.7 մլրդ դրամ։

Արտաքին առևտուր

Արտաքին առևտրաշրջանառությունը 2018 թվականի հունվար-մայիսին՝ նախորդ տարվա նույն ժամանակահատվածի համեմատ, աճել է 32.4%-ով և կազմել 2.8 մլրդ դոլար։

Այդ թվում՝ արտահանումն աճել է 24.1%-ով և կազմել 935.6 մլն դոլար, իսկ ներմուծումն աճել է 37%-ով և կազմել 1 մլրդ 868.5 մլն դոլար։

* * *

Նշենք, որ Նիկոլ Փաշինյանը վարչապետ նշանակվեց մայիսի 8-ին և նոր կառավարության կազմը մինչև մայիսի 15-ն արդեն գրեթե ամբողջությամբ ձևավորված էր։ Այսինքն, զուտ ժամանակագրական առումով՝ մայիսը մասամբ կարելի է համարել Փաշինյանի կառավարության օրոք ընկած ժամանակահատված։ Սակայն, բնականաբար, մայիսին արձանագրված սոցիալ-տնտեսական ցուցանիշները ոչ մի դեպքում չի կարելի համարել նոր կառավարության գործունեության արդյունք, քանի որ դրանք նախորդ կառավարության գործունեության արդյունքներն են։

Նիկոլ Փաշինյանի գործունեության արդյունքները տնտեսական վիճակագրության մեջ կերևան 2-3 ամսից ոչ շուտ։ Ընդ որում, նոր կառավարությունը դեռևս տնտեսական բնույթի որևէ լուրջ օրենսդրական նախաձեռնություն չի ցուցաբերել (բացառությամբ՝ կուտակային կենսաթոշակի), և տնտեսությունը շարժվելու է նախկին ամիսների իներցիայով։

Սակայն կա մի կարևոր հանգամանք, որը կարող է նկատելիորեն ազդել տնտեսական ցուցանիշների վրա։ Ստվերի և կոռուպցիայի դեմ իրականացվող քայլերը, որոնք թափ առան մայիսի վերջին և շարունակվում են մինչ օրս, կարող են նպաստել, որ հատկապես ներքին և արտաքին առևտրի ոլորտում արդեն հունիսի արդյունքներով գրանցվեն կտրուկ փոփոխություններ՝ «սպիտակ» դաշտ տեղափոխված ստվերի հաշվին։ Սակայն դա կարտացոլի ոչ թե տնտեսական վիճակի փոփոխություն, այլ կլինի պարզապես վիճակագրական տվյալների ճշգրտում։

ԱՄԵՆԱԿԱՐԴԱՑՎԱԾ ԼՈՒՐԵՐ

Երբ կգան ներդրումները

«Քաղաքական կայունության պահպանման պայմաններում դրական սպասումները, մեծ հավանականությամբ, վեր են ածվելու ներդրումային հոսքի…

«Որևէ մեկը չի պլստալու, ես հավաստիացնում եմ». Նիկոլ Փաշինյան

Վարչապետ Նիկոլ Փաշինյանը հորդորում է չկասկածել, որ օրենքով նախատեսված հիմքերի առկայության դեպքում որևէ մեկը պատասխանատվության չի ենթարկվելու:

Կառավարության նիստը մեկնարկել է (ուղիղ)

ՀՀ կառավարության նիստը մեկնարկել է։